+0 به يه ن
ائل ادبياتيندان حيكايه (علي ايماني)
بيري وارميش بيري يوخموش. اسكي زامانلاردا بير شاه وارميش. بو شاهين بير وزيري وارميش.
دئيير بير گون شاه داريخير وزيريني چاغيرير دئيير:
«آي وزير من برك داريخيرام بو آروادلاردا مني تنگه گَتيريبلر. گَل بير چؤله باييرا چيخاق.»
وزير: «منيم گؤزوم اوسته شاها همين الآن آتلاري حاضيرلارام.»
شاهدا درباري ليباسلارين اوستوندن معمولي ليباس گئيدي. وزير آتلاري حاضيرلاييب يولا دوشدولر. چوخلو يول گئدندن سونرا بير كندين ياخينليغينا يئتيشديلر. گوردولر كي بير قوجا كيشي اؤكوز ايله جوت سورور يعني يئري كوتان ايله شوخوم وورور آما بير تعجوبلو مسأله‌يه راست گليرلر كي اودا بودور كي بو قوجا كيشي يئري شوخوم وورا وورا بير سئري كردينين اوّلينده بير سئري ده آخرينده اوينايير.
گئتديلر قاباغا.
شاه: «سلام آي قوجا»
قوجا: «سلام عليكم»
وزير: «يورولماياسان آي كيشي!»
قوجا: «ساغ اول قارداش. آللاه سيزي‌ده يورماسين!»
قوجا كيشي‌ده صوبحانه‌سين حاضيرلاميشدي و گؤزله‌ييردي كي اوْجاق اوستونده‌كي چايي قايناسين. تا چاي چؤرگين يئسين .
قوجا: «بويورن قارداش سيزده بير تيكه چؤرك يئيين!»
شاهينان وزير يئرييب قاباغا اوْتورورلار سوفره‌نين باشيندا. چاي چؤركدن سونرا شاه دئيير: آي قوجا بيز گؤردوك كي سن يئر سورورسن آما بونا تعوجوبلنديك كي سن نئيه زمي‌نين اوّلينده بيرده آخيرينده اوْيناييرسان. آخير بئله گؤرونوركي سن چوْخ شادسان.
قوجا : «قارداشيمين باش ساغ اولسون منيم بو كئفي سازليغيمين بير عيلّتي واردير اودا بودوركي تانري منه بير نجابتلي و سليقه‌لي و خوش اخلاق بير آرواد يئتيريب. اونون ياخشي‌ليغيندان‌دير كي كئفيم بئله كؤكدور.»
شاه : «آي كيشي مگر بو آرواد نئينير كي سنين كئفين بئله سازدير؟»
قوجا: «هئچ زاد! سحر تئزدن دورار سماوري آليشديرار سونرا مني اوْيالدار و منيم چاي چؤرگيمي وئريب سونرا منيم چؤل دستماليمي باغلاييب مني يولا سالار. بو آرودين ادالاريدير كي مني بئله كئفي ساز ائيله‌يير.
شاه قوجا كيشي‌نين بو سؤزلريندن ناراحات اولور چونكي اونون اوچ دنه آروادي واريدي كي اوچون تاپداسايدين بو قوجا كيشي‌نين آروادي‌نين يئرين وئرمزدي. چونكي بيري اويناش‌بازيدي ، داييم درباردا يئييب ايچيب فيكري وزيرلر و درباريلرله اويناشبازليقدايدي. ايكينجي اَلي اَيرييدي يعني اوغرويدو ، داييم دربارين قير _ قيزيلين اوغورلاردي و ساتاردي. اوچونجوسو سؤز بازيدي ، سؤزو بوندان آليب او بيري‌نين قولاغينا يئتيرردي و خالقي سالاردي بير-بيري‌نين جانينا. بودور كي شاه بيردن قوجايا دئدي:
«آي كيشي نئجه‌سن آروادلاريميزي دَييشه‌ك. سن آرواديوي منه وئر منده اوچ آرواديمي وئريم سنه.»
قوجا حيرصلنيب دئدي: «آي گَده! نه دئييرسن مگر من بئغئيرتم كي آرواديمي دَگيشم، بو هانسي دينده دير كي دئيير آروادي دَگيشين؟»
وزير: «آي كيشي هئچ بيليرسن كيمي‌نن دانيشيرسان سن مملكتين شاهي‌نين قاباغيندا دوروبسان.» بو هاندا شاه كوچه پالتارلاريني يئره ساليب درباري ليباسلاري اوزه چيخدي. قوجانين اَل آياغي تيترَتمه‌يه دوشدو و رنگي آتدي.
شاه: «آ كيشي من دئميرم گَل دَييشك. سن بوشا من آليم من بوشويوم سن آل و كمريندن بير كيسه قيزيل پول چيخاديب كيشي‌يه وئردي و آروادلارين بوشاييب او بيريني آلدي. آرادا شاه قوجايا دئدي: «آي قوجا اوّلده سنه دئييم كي بو آروادلارين هره‌سي‌نين بير بؤيوك عئيبي واردير. بيري اوْيناشباز، بيري اوْغرو اوبيري‌ده سؤزبازدي.»
بو ماجرادن آيلار كئچر و بير گون شاه وزيرينه دئيير: «آي وزير گَل صاباح گئدك گؤرك كي بو قوجانين باشينا نه گليب‌دي. ايندي‌يه جن بو نانجيب آروادلار اونو حتماً اؤلدوروبلر.»
گئديللر يئتيشيرلر همانكي يئره آما بو سئري داها تعجوبلَنيرلر. گؤروللركي قوجا كيشي بير دفعه زمي‌نين اوّلينده بير دفعه اورتاسيندا بيرده آخيرينده اوينايير. بونا گؤره گئديللر قاباغا. قوجا كيشي بونلاري گؤرركن اونلاري قاباقلاييب:
-« سلام شاها ! خوش گلميسيز بويورون اَيله‌شين من ايندي چايي حاضيرلارام»
شاه: «آي كيشي بو گئنه نه اويوندور قاباقجا ايكي دفعه اوينوردون ايندي اوچ دفعه؟ بيز دئديق بو آروادلار سني اؤلدورللر سنين عؤمرووي چورودللر آما ايش ترسه اولوب.»
قوجا بو سؤزلره قولاق آساندان سونرا دئدي: « شاه سلامت قالسين من بو آروادلاري آلاندان سونرا گؤردوم كي من بو آروادلارينان باجارماياجام اونا گؤره اوتوردوم بوركومو قويدوم قاباغيما بير فيكيرلر ائله‌ديم. چون كي واخت كئچيردي اوچ دنه آرواد چاققال كيمي دوشموشدولر منيم جانيما هره‌سي بير جور شئيطان توخومو كيمي يورد- يووامي تالاييرديلار.
بيري گونده ائوه كيشي گَتيريردي. او بيري ائوين ياغين، دويوسون، بوغداسين ساتيردي او بيرسي‌ده سؤزبازليق ائديب همسايالاري ساليردي بير-بيري‌نين جانينا. اودور كي فيكيرلَشيب تصميمي‌مي توتدوم.
اوّلده اويناشباز آرواديمين فيكرين ائله‌ديم، گتيرديم حَيطه بير دنه ايضافه قاپي قويدوم. اويناشباز آرواديمي چاغيريب دئديم:
«آرواد سن اويناشبازليق ائله‌ييرسن منده بيليرم. ايندي كي سن اؤز ايشينده‌سن و منيم‌ده ايشيم يوخدور من ائوه گلنده باري كيشي دوستلاريني او بيري قاپيدان يولا سال گئتسين تا منيم گؤزوم اولارا ساتاشماسين. اويناشباز آرواديم بو سؤزلرله هوشو باشينا گليب بو ايشلريني ترك ائله‌دي حتي قوللارين چيرمالاييب تازا قاپي‌نين يئرين اؤزو توتدو.
ايكينجي آرواديم كي اَلي اَيريدي و ائوين هر شئيين ساتاردي اونا دا بئله بير فيكر ائله‌ديم. بير گون گئتديم بازارا و بير دنه تارازي آلديم ائوه گليب اوغرو آرواديمي چاغيرديم:
- «آي آرواد»
-«هه آي كيشي نه دئييرسن؟»
قوجا: «گل بورايا سنه بير شئي آلميشام»
آرواديم گلدي منده تارازيني توربادان چيخاردديم قويدوم قاباغينا.
اَلي اَيري آرواد: «بو نه‌دير آي كيشي من بونو نئينيرم نه ايشيمه دَير؟»
قوجا: « آرواد بيليرسن! من بيليرم كي سن ائوين ياغ دويوسون، بوغداسين ساتيرسان اؤزونده بونو ياخشي بيليرسن. آما من دئميرم ساتما. سات آما داش تارازينان سات كي باشيوا بؤرك گئچمه‌سين.» اوغرو آرواديم بو سؤزلري ائشيديب اؤز ايشلريندن پشيمان اولدو و اَلي اََيريليغين داشيني آتدي.»
قوجا كيشي چوبوغون آليشديريب بير ايكي پوك ووراندان سونرا سؤزونه ايدامه وئريدي.
-«عرض ائله‌ييم شاهيما كي من بو سؤزباز آرواديما هر نه قدر دئديم سايمادي و اؤز ايشينه باخدي. بير آز زماندان سونرا كندين جماعاتين سالدي بير-بير‌نين جانينا و من قالديم جماعتين قاخينجي‌نين آلتيندا كي بو نه آرواددير آي كيشي كي سن تاپميسان؟
چوخ فيكيردن سونرا گؤردوم كي بو آروادين نوخوشلوغو دوزلمييه‌جك اودور كي بير فيكر ائله‌ديم. بير گئجه آروادي چاغيريب دئديم: «آي آرواد صاباح سحر تئزدن گئده‌جه‌ييك بير يئره. بونو يالنيز سنه دئييرم او بيرلره دئمه.»
سحر تئزدن سؤزباز آرواديمي مينديرديم آتين يهرينه و يولا دوشدوك. يولدا ها سوروشدو كي آي كيشي هارا گئديريك دئديم دؤز آرواد – دؤز ايندي گؤررسن. او زماندا ياز فصلي ايدي و بيز چؤلده يول گئديرديك. گلديك يئتيشديك آجي چايا. دئديم :«آرواد گَل! بورا دئديگيم يئردير.» آرواد سؤروشدو: «هانكي يئر؟»
دئديم :«گؤرمورسن آجي چايي دئييرم گؤرنه قشنگدير.»
آرواد: «آي كيشي آغلين آزيب مني كنددن بورايا چايي تاماشا ائله‌مگه گتيرميسن؟»
دئديم: «آرواد سن بيلميرسن كي هامي چايي تاماشا ائله‌مگه گليرلر بورايا.» او گونده يازين اوچونجو گونويدي. آتين نوختاسيندان ياپيشيب گتيرديم كؤرپونون اوستونه.
او گونده آجي چاي يامان داشقين و جوشقون گليردي. آز قاليردي كؤرپونو ييخسين. آتي كؤرپونون اوستونه گَتيرندن سونرا دئديم: «گؤرورسن آرواد نه قشنگ منظره‌دي ايندي ايناندين؟»
سؤزباز آرواديم دئدي: «نه بيليم واللاه.» دئديم :«آرواد سن باخ سوداكي باليقلارا گؤر نه قشنگديرلر.»
آرواد كي اَييلدي باليقلارا باخماغا منده بير تَپيك قويدوم اونباسي‌نين اوستوندن كله‌سي اوسته گئتدي چايين ايچينه. نه قدر چيغيردي من فيكير وئرمه‌ديم. اونداكي آجي چاي سؤزباز آرواديمي سورعتي‌نن آپاريردي من چايين ترسينه گئديب سؤزباز آرواديمي آختاريرديم.»
قوجا: «بلي شاها بو اولدي منيم ماجرام. اوندان سونرا كي ائوه قاييتديم خوشبخت ياشاديم. چونكي ايندي ايكي دنه ياخشي آرواديم واريدي. بيري چاييمي اوبيرسي‌ده چؤرگيمي وئريردي. آخشام ائوه گلنده بيري آياقلاريمي يويوب اوبيري‌ده چيگينلريمي اوغور. بو سببلره گؤره‌دير كي ايندي اوچ دفعه زمي بويو اويناييرام»
شاه قوجانين فراستينه ساغ اول دئييب كمرلرينده هر نه قيزيل پول واريدي اونا باغيشلاديلار. سونرا يولا دوشوب گئتديلر ايشلري‌نين دالينجا.
قوجا كيشي يئنه‌ده زمي بويون اوچ دفعه اوينادي چونكي اونون فراستي واريدي.
گؤنده ر
بؤلوم لر:
türki nağıllar